اٹھا کر ہاتھ لوگوں میں دُعائیں بانٹ دیتا ہے

اٹھا کر ہاتھ لوگوں میں دُعائیں بانٹ دیتا ہے

وہ سُورج کی طرح اپنی شعاعیں بانٹ دیتا ہے

---

اتر جاتی ہے جب لفظوں کے سر سے نور کی چادر

وہ خوشبو سے دھلی ان میں ردائیں بانٹ دیتا ہے

---

کسی بستی کے اندر جب اندھیرے سر اٹھاتے ہیں

وہ اُس بستی میں کتنی ہی ضیائیں بانٹ دیتا ہے

---

بچا کر شام تک کچھ بھی نہیں رکھتا خزانوں میں

وہ دونوں ہاتھ سے اپنی عطائیں بانٹ دیتا ہے

---

زیادہ منتظر رکھتا نہیں صحرا نشینوں کو

وہ ٹھنڈی اور جاں پرور ہوائیں بانٹ دیتا ہے

---

زمیں کے باسیوں میں عرش سے اتری ہوئی انجم

کُھلے دل سے وہ جنت کی فضائیں بانٹ دیتا ہے