ضیائے محفلِ شب میں تجلیِ سحر میں ہے

ضیائے محفلِ شب میں تجلیِ سحر میں ہے

جمالِ روئے زیبائے نبیؐ شمس و قمر میں ہے

---

فرنگی اقتدا میں ہے نہ تقلیدِ دِگر میں ہے

فلاحِ دین و دنیا طاعتِ خیر البشر میں ہے

---

بشر کیا جان پائے منزلِ رفعت پیمبر کی

حدِ جبریل بھی سرکار کی جب رہ گزر میں ہے

---

دعا دے کر ستم گاروں کو بھی آقاؐ نے بتلایا

نمایاں خیر کا پہلو خطا کے گرگزر میں ہے

---

وہ کیا خاطر میں لائے حسنِ ایوانِ شہنشاہی

جمالِ گنبدِ خضریٰ بسا جس کی نظر میں ہے

---

رسالت کی گواہی دے رہی ہیں ننھی کنکریاں

شعورِ آگہی بوجہل سے بہتر حجر میں ہے

---

جہانِ شش جہت، گُل آسماں، لوح و قلم، کرسی

وجود ان کا طفیلِ آمدِ خیر البشر میں ہے

---

خدا نے کیسی کیسی عظمتیں بخشیں صحابہ کو

ہیں طیبہ میں عمر ایران کا منظر نظر میں ہے

---

ملے گی کامرانی دونوں عالم کی تجھے احسؔن

اگر سودائے حُبِ سرورِ دیں تیرے سر میں ہے