خوب عمدہ ذوق کے مالک ہیں شاکر قادری

خوب عمدہ ذوق کے مالک ہیں شاکر قادری

ہے میسّر اُن کو اربابِ سخن پر برتری

---

گلشنِ آلِ عبا کا ہیں یہ دلکش ایک پھول

اِن کے سینہ میں ہے روشن مشعلِ عشقِ نبی

---

ہیں شرافت اور متانت کا یہ اک پیکر حسیں

رطب و یابس سے ہے بس محفوظ ان کی شاعری

---

مشتمل نعتِ نبی پر ہے نئی ان کی کتاب

جذبۂ ایمان پر آئے گی اس سے تازگی

---

باعثِ تخلیقِ عالم ہیں مُحمَّد مُصطفٰیؐ

کی عطا اُن کو خدا نے ہر جہاں کی سروری

---

رمزِ وحدت بھی وہی ہیں رازِ کثرت بھی وہی

ہے انہیں سے سب انہیں کا سب حقیقت ہے یہی

---

جو نہیں اُن کا خدا کا ہو نہیں سکتا کبھی

ہے محبت اور اطاعت اُن کی جانِ بندگی

---

ہے ثنا خواں اُن کا خود ربِّ جہاں قرآن میں

بارگہ میں اُن کی یہ نذرانہ ہے یکتا جلی

---

پیش کرتا ہوں بصدقِ دل مبارک اس پہ میں

مجھ کو ہے اس کی اشاعت پر نمایاں اِک خوشی

---

فکر تھی فیض الامیؔں مجھ کو سنینِ چاپ کی

بولا ہاتف چشمۂ گوہر، چراغِ اکبری