کیا بتائے گا کوئی رِفعتِ بامِ حسنین
چرخِ لاہُوت پہ ہے ماہِ تمامِ حسنین
کوئی دیوانہ خبر لائے تو لائے ورنہ
حدِ ادراک سے آگے ہے مقام حسنین
کِتنے خوش ہیں غمِ حسنین میں جلنے والے
کِتنے وارستہ ہیں پا بستٔہ دامِ حسنین
غمِ حسنین پہ کونین کی خوشیاں قُرباں
رُوکشِ صُبحِ ازل ہے سرِ شامِ حسنین
کِسی نا اہل پہ کھُلتا نہیں کونین کا راز
کسی کم ظرف کو ملتا نہیں جامِ حسنَین
ہائے وہ سر جو نہ ہو خاکِ درِ آلِ رسولؐ
ہائے وہ دل کہ نہ ہو جس میں مقامِ حسنین
کون ایسا ہے جو اِس گھر کا نمک خوار نہیں
وا نہیں کس پہ درِ بخششِ عامِ حسنین
نارِ دوزخ سے ہے محفوظ گدائے شبّیر
بے نیازِ غمِ عقبےٰ ہے غلامِ حسنین
ہے اسِی حسنِ عمل پر مری بخشش کا مدار
میرے افسانے کا عُنواں ہے ”بنامِ حسنین“
ناز کرتی نہ صبا اپنے چلَن پر اعظؔم
دیکھ لیتی اگر اندازِ خرامِ حسنین
شاعر کا نام :- محمد اعظم چشتی
کتاب کا نام :- کلیاتِ اعظم چشتی