لج پال کریماں سخیا تیرا آ ملیا دروازه کر کرم غریب نوازا
تیرے منگتے تیرے در تے دیندے نیں ایہہ آوازہ کر کرم غریب نوازا
آئے نیں تیرے در تے ساڈے ستے لیکھ جگا دے
اجمیر دا صدقہ سانوں اج خیر کرم دا پا دے
خالی نہ موڑیں در توں تیرا وسدا رئے دروازہ کر کرم غریب نوازا
باوا گنج شکر دا صدقہ آج سب دی جھولی بھر دے
تینوں بخشیاں رب توفیقاں اک نظر کرم دی کر دے
میرے درداں دا کر چارا میرے سوہنے چارہ سازا کر کرم غریب نوازا
تیری قائم رہوے سلطانی میں کہنوں آکھ سناواں
میرے پاک وطن تے خواجہ نت رہن کرم دیاں چھانواں
سانوں دم دم تیریاں لوڑاں لج پال سخی دم سازا کر کرم غریب نوازا
تیرے دربار دیاں میں سدا منگ دا رہناں خیراں
میری پہنچ نہیں اوتھوں تیکر جس جا تے تیریاں سیراں
اچی اے وہم خیالوں پرواز تیری شہبازا کر کرم غریب نوازا
میں سوہنیاں جپدا رہناں تیرا سوہنا اسم گرامی
اک نظر کرم دی کر کے میرے دھو دے عیب تمامی
میرے عیباں نالوں خواجہ تیری رحمت بے اندازا کر کرم غریب نوازا
منگتے ہاں تیرے در دے اسیں تیرے کولوں منگناں
جیہڑا چڑھیا تیرے گھر تے اس سوہنے رنگ وچ رنگناں
تینوں واسطہ پیر عثمان دا رنگ چاہڑ دیویں رنگسازا کر کرم غریب نوازا
میرے عیباں ول نہ جاویں سدا میرے تے رئیں راضی
رہوے اوندا جاندا خواجہ تیرے دربار نیازی
مینوں اوکھے سوکھے ویلے تیرا بھلے نہ دروازہ کر کرم غریب نوازا
شاعر کا نام :- عبدالستار نیازی
کتاب کا نام :- کلیات نیازی