آساں دیاں بوٹیاں تے بور آؤندا جاندا اے
نماں نماں دل نوں سرور آؤندا جاندا اے
جنہاں نے نظارہ کیتا سوہنے دے مدینے دا
اوہناں دیاں اکھیاں چہ نور آؤندا جاندا اے
لوڑ ای نئیں رہی مینوں جام تے صراحی دی
مینوں تیرے نام دا سرور آؤندا جاندا اے
دائم الحضوری دی حضوری وچ جانا ایں
ہوش کر کملیا قصور آؤندا جاندا اے
سج دیاں دروداں دیاں جتھے وی نے محفلاں
اوتھے کملی والا وی ضرور آؤندا جاندا اے
کنے دسو ریس کرنی اوس دے نصیباں دی
جیہڑا میرے سوہنے دے حضور آؤندا جاندا اے
مدنی ہواواں دیاں عجب تاثیراں نیں
دل والے زخم تے انگور آؤندا جاندا اے
جوش وچ سوہنے دیاں رحمتاں نوں دیکھ کے
یاد ہر اپنا قصور آؤندا جاندا اے
جدوں توں نیازی لکھی نعت سوہنے نبی دی
مینوں شعر کہن دا شعور آؤندا جاندا اے
شاعر کا نام :- عبدالستار نیازی
کتاب کا نام :- کلیات نیازی