بسا ہوا ہے نبی کا دیار آنکھوں میں

بسا ہوا ہے نبی کا دیار آنکھوں میں

سجائے بیٹھا ہوں اک جلوہ زار آنکھوں میں

---

جو دن مدینے میں گزرے ہیں ان کا کیا کہنا

رچے ہوئے ہیں وہ لیل و نہار آنکھوں میں

---

دیار پاک کا ہر منظر حسین و جمیل

رہے گا تابہ قضا یادگار آنکھوں میں

---

عطا کیا جو مدینے کے باسیوں نے مجھے

مہک رہا ہے ابھی تک وہ پیار آنکھوں میں

---

بغیر دیکھے مدینہ انہیں نظر آیا

ہیں منفرد مِری آنکھیں ہزار آنکھوں میں

---

اب اس سے بڑھ کے کوئی سرمہ اور کیا ہوگا

سمیٹ لایا ہوں میں کچھ غبار آنکھوں میں

---

دیارِ پاک کی جن کو ہوئی ہے دید نصیب

میں ڈھونڈلوں گا وہ آنکھیں ہزار آنکھوں میں

---

سناؤں گا وہ کہانی حضورؐ کو جا کر

چھپائے بیٹھا ہوں جو اشکبار آنکھوں میں

---

ہے اعتماد بھی اقباؔل کو شفاعت پر

سزا کا خوف بھی ہے گنہگار آنکھوں میں