درودِ پاک کا دفتر زمیں سے آسماں تک ہے

درودِ پاک کا دفتر زمیں سے آسماں تک ہے

نچھاور سرورِ دیں پر زمیں سے آسماں تک ہے

---

بوقتِ صبحِ صادق کون آیا آمنہ کے گھر

خدا کے نور کی چادر زمیں سے آسماں تک ہے

---

خدا نے رفعتیں بخشی ہیں جن کے ذکرِ انور کو

انہیں کا تذکرہ گھر گھر زمیں سے آسماں تک ہے

---

یہاں بھی کام آتا ہے وہاں بھی کام آئے گا

مِرا آقا مِرا یاور زمیں سے آسماں تک ہے

---

ہوئے ہیں لامکاں کے جو مکیں معراج کی شب میں

پہنچ اُن کی کہوں کیوں کرزمیں سے آسماں تک ہے

---

یہاں بھی حکمرانی ہے وہاں بھی حکمراں ہیں وہ

شفیعِ حشر کا دفتر زمیں سے آسماں تک ہے

---

اگر ایماں کی پوچھو تو یہی ہے بات ایماں کی

شفیقؔ اُن کا کہاں ہمسر زمیں سے آسماں تک ہے