عشق شہ دیں مر کے بھی مرنے نہیں دیتا

عشق شہ دیں مر کے بھی مرنے نہیں دیتا

آقا کا کرم مجھ کو بکھرنے نہیں دیتا

---

میں شوق زیارت میں سدا گرم سفر ہوں

یہ شوق کہیں مجھ کو ٹھہرنے نہیں دیتا

---

بے مانگے ہی ہر ایک کی بھر دیتا ہے جھولی

وہ کوشش اظہار بھی کرنے نہیں دیتا

---

وه اوج مقدر جو مجھے اس نے دیا ہے

اس اوج مقدر سے اترنے نہیں دیتا

---

غیروں کا خیال آئے مرے دل میں تو کیسے

وہ ایسے خیالوں سے گزرنے نہیں دیتا

---

ہر لحظہ نیا لطف دیا زخم جگر نے

اس زخم کو میں تو کبھی بھرنے نہیں دیتا

---

ہے دامن رحمت مرے ہاتھوں میں نیازی

دوزخ سے کرم آپ کا ڈرنے نہیں دیتا