جدا ہُوا مِری آنکھوں سے اُن کا نُور کہاں

جدا ہُوا مِری آنکھوں سے اُن کا نُور کہاں

دل و نگاہ سے جلوے نبیؐ کے دُور کہاں

---

نگارِ عرش کہاں ہے کلیمِؑ طُور کہاں

پہنچ گئے شبِ اسریٰ مِرے حضورؐ کہاں

---

جو چشم ساقیٔ کوثر سے فیض یاب نہیں

نصیب ہے اُسے جامِ مئے طَہُور کہاں

---

ہزار رشک ہیں جنت کو ارضِ طیبہ پر

یہ انبساط، یہ تسکین، یہ سُرور کہاں

---

جسے نصیب ہوئی دیدِ روضۂ اطہر

رسولِؐ پاک کی رحمت سے ہے وہ دُور کہاں

---

نگاہ وادیٔ ایمن میں کیوں بھٹکتی پھرے

کہاں مدینے کا عالَم، جہانِ طُور کہاں

---

یہ کہہ کے حشر میں ہر اُمّتی پکارے گا

مِرے حُضورؐ کہاں ہیں، مِرے حُضورؐ کہاں

---

یہاں ہے جسم، مگر رُوح ہے وہاں میری

نظر سے دُور مدینہ ہے، دل سے دُور کہاں

---

دُعا یہ کی ہے کہ اُس دَر پہ پھر رسائی ہو

لرز رہا ہُوں یہ عاصی کہاں، حُضورؐ کہاں

---

وہ ذات، زینتِ افلاک و صبح گاہِ ازل

کہاں کا نُور تھا، لیکن ہُوا ظُہور کہاں

---

نصیرؔ! اُن کے تصور سے دل کو روشن کر

تری نگاہ کو تابِ شعاعِ نُور کہاں