کملی والیا سد لے در تے رو رو کراں پُکاراں
ہجر ترے نے مار مکایا کوئی نہیں لیندا ساراں
یاد تیری آوندی اے آکے تڑپاوندی اے روضے اُتے سوہنیا بلا
ہنجو میرے چلدے نے غم سینہ سلدے نے اگ میرے دل دی بُجھا
یاد تیری وچ رو رو آقا اٹھے پہر گزاراں
کملی والیا سد لے در تے رو رو کراں پکاراں
مُک چلی جان آقا چڑھے نے طوفان آقا بیڑا میرا تار سوہنیا
روضے دی میں شان آقا کدی ویکھاں آن آقا سدیں اکوار سوہنیا
چُم چُم کے روضے دی جالی سڑدیاں اکھاں ٹھاراں
کملی والیا سد لے در تے رو رو کراں پکاراں
لٹیا قرار میرا سینہ اے فگار میرا غم نے ہزار سوہنیا
ویکھ کدی حال میرا روندا وال وال میرا بیڑا میرا تار سوہنیا
دید تیری دی تاہنگ نے سوہنیا لائے روگ ہزاراں
کملی والیا سد لے در تے رو رو کراں پکاراں
وسے دربار تیرا ملے جے دیدار تیرا جان دیواں وار سوہنیا
در فیض بار تیرا روضہ طرحدار تیرا دِلاں دا قرار سوہنیا
مر چلیا اے صائم تیرا کھا کھا غم دیاں ماراں
کملی والیا سد لے در تے رو رو کراں پکاراں
شاعر کا نام :- علامہ صائم چشتی
کتاب کا نام :- کلیات صائم چشتی