خدا گواہ کہ بے حدّ و بے کراں ہیں حضُورؐ

خدا گواہ کہ بے حدّ و بے کراں ہیں حضُورؐ

جہاں جہاں ہے خدائی وہاں وہاں ہیں حضُورؐ

---

ازل سے تا بہ ابد میرِ کارواں میں حضوؐر

کوئی یہ مُجھ سے نہ کہنا کہ اب کہاں میں حضوؐر

---

زمانے اُنؐ کے ہیں پست و بلند اُنؐ کے ہیں

اُتر کے فرشِ زمیں پر بھی آسماں ہیں حضوؐر

---

کوئی کہیں بھی ہو اُنؐ کے کرم سے دُور نہیں

تمام عالمِ امکاں پہ مہرباں ہیں حضُور ؐ

---

خدا کی ذات سے یادِ نبیؐ ہے وابستہ

جہاں بھی ذکرِ خدا کیجئے وہاں ہیں حضورؐ

---

عجیب طرح کا رشتہ ہے دست و دامن میں

میں لاکھ پیکرِ غم ہوں مری اَماں ہیں حضورؐ

---

نہ جانے اُمّتِ عاصی کا حشر کیا ہوتا

زہے کہ بندہ و آقا کے درمیاں ہیں حضورؐ