کیا عجب شانِ مصطؐفائی ہے
شیفتہ جس پہ کبریائی ہے
اُس کا سایہ چھپا لیا حق نے
جس کے سائے میں سب خدائی ہے
کوئی پہنچا وہاں نہ پہنچے گا !
جس جگہ تک تری رسائی ہے
فکرِ عُقبےٰ نے کر دیا بیدل
میرے آقا تری دہائی ہے
تیری رحمت نے یا رسُول اللہؐ
کِس کی بگڑی نہیں بنائی ہے
مِل گئی اُس کو دولت کونین
جس کو حاصِل تری گدائی ہے
نازدل پر کرو نہ اے اعظؔم
جانتے ہو یہ شے پَرائی ہے
شاعر کا نام :- محمد اعظم چشتی
کتاب کا نام :- کلیاتِ اعظم چشتی