مریضِ غم کو ملے گی شفا مدینے سے
ہر ایک دکھ کی ملے گی دوا مدینے سے
جمالِ گنبد خضریٰ ہمیں نظر آئے
دلوں کا تار اگر ہو جُڑا مدینے سے
کہا ہے وقتِ مصیبت اغِثنی جب میں نے
کرم کی اٹھّی ہے اس دم گھٹا مدینے سے
درِ رسول پہ آ کر بنا لو بگڑا نصیب
وہ دیکھو آتی ہے پیہم صدا مدینے سے
ہر ایک غنچۂ امّید کھِل اٹھا اس دم
نبی کی جس گھڑی آئی عطا مدینے سے
وہیں پہ ہوتی ہے تشنہ دہن کی سیرابی
کرم کی اٹھتی ہے ہر دم گھٹا مدینے سے
دوانے جھوم اٹھے جس گھڑی حضوری کا
پیام لے کے جو آئی صبا مدینے سے
پلٹ کے آئے خدا پھر سے دورِ عثمانی
الٰہی دور ہو نجدی بلا مدینے سے
یہی ہے آرزو، حسرت یہی ہے احمدؔ کی
کبھی نہ لوٹ کے آئے شہا مدینے سے
نبی کے عشق میں خود کو فنا کرو احمد
ضرور تم کو ملے گی بقا مدینے سے
شاعر کا نام :- مولانا طفیل احمد مصباحی
کتاب کا نام :- حَرفِ مِدحَت