مُصؐطفےٰ کہیے مُجتبےٰؐ کہیے
مظہرِ نُورِ کبریا کہیے
بادشاہ کہیے ‘ پیشوا کہیے
رہنما کہیے ، مُقتدا کہیے
مُبتدا کہیے مُنتہا کہیے
وجہِ تخلیقِ دوسَرا کہیے
دونوں عَالم کا مدّعا کہیے
بے سہاروں کا آسرا کہیے
پیکرِ حُسنِ جاں فزا کہیے
با حیا کہیے با وفا کہیے
گُلِ گُلزارِ آمنہ کہیے
باغِ توحید کی فضا کہیے
مخزن الخُلقِ وَالسّخا کہیے
معدنُ الجُودِ والعطَا کہیے
جَلوۂ رُوئے اَینما کہیے
طلعتِ مشعلِ ھُدیٰ کہیے
نازش و فخر انبیا کہیے
ظلِّ ذی المجد والعُلا کہیے
عقل کہتی ہے مِثْلُنا کہیے
عِشق بے تاب ہے خدا کہیے
نہ خُدا کہیے نہ جُدا کہیے
عبدہٗ کہیے حق نُما کہیے
جس کو اعظؔم حضُور آپ سُنیں
ایسی مِدحت کو مَرحبا کہیے
شاعر کا نام :- محمد اعظم چشتی
کتاب کا نام :- کلیاتِ اعظم چشتی