نوری مکھڑا نالے زلفاں کالیاں
صدقے واری جان ویخن والیاں
چن چڑھیا آمنہ دے لال دا
مک گیاں دنیا توں راتاں کالیاں
تیرے ویہڑے کھیڈے رب دا لاڈلا
واہ حلیمہؓ تیریاں خوش حالیاں
ویخ کے رتبہ بلال حبش دا
ہو گیاں قربان شکلاں والیاں
لکھاں اوہدے در دا پانی بھر دیاں
صورتاں ہن موہنیاں متوالیاں
سوں گئی امت تے آقاؐ جاگدے
کیتیاں سرکارؐ نے لج پالیاں
بے کساں، مظلوماں، دکھیاراں دیاں
میرے آقا کیتیاں رکھوالیاں
میرا منہ آ کے فرشتے چم دے
چمیاں جد روضے دیاں میں جالیاں
عشق دے جھلے ای نمبر لے گئے
عقلمنداں اینویں عمراں گالیاں
اجڑیاں راہواں توں سوہنا گزریا
چارے پاسے ہوگیاں ہریالیاں
میں ظہوریؔ صدقے اوہدے نام توں
ساریاں جس نے بلاواں ٹالیاں
شاعر کا نام :- محمد علی ظہوری
کتاب کا نام :- صفتاں سوہنے دیاں