تیری رات تڑپ دیاں لنگھ جاوے نہ دن ویلے آرام آوے
ایس پاک وطن و چہ جد تیکر نہ سوہنے نبی ﷺ دا نظام آوے
ایہو جے نظام محمد دا ایہو اسلام محمد ﷺ دا
ہتھ ہون مہاراں آقا دے اتے اوٹھ دے بیٹھا غلام آوے
تیرا ہر کم ہو وے یار لئی مرناں جیوناں سرکار لئی
اوہدے ذکرتے اوہدی یاد بناں جیہڑا ساہ آوے او حرام آوے
اٹھ ویلا نئیں تمہیداں دا تینوں کہندا خون شہیداں دا
ایہہ پھیر وی سودا سستا اے جے سر دتیاں اسلام آوے
توں ہور خدا توں کی لیناں تیرے عشق دا ایہو ہے گہناں
تیرا کملیا کملی والے دے دیوانیاں وچہ جے نام آوے
تسیں رل مل یار دعا منگو ایتھے نور نبی ﷺ دی ضیا منگو
جیہڑی گم کر دیوے منزل نوں مرے دیس چہ اوہ نہ شام آوے
جے چاہوں لذت جینے دی چمدا رو خاک مدینے دی
سر نیواں کر کے ہر نوری جتھے یار نوں کرن سلام آوے
اونہاں خوش بخت میخواراں نوں کی لوڑاں ٹھیکے جان دیاں
سرکار دے عشق دا جنہاں لئی طیبہ چوں نیازی جام آوے
اس زندگی نوں میں کی آکھاں جیہڑی ٹھیکیاں دیوچہ بیتی اے
دھن بھاگ اوناں خوش بختاں دے جنہاں یار دے کولوں پیتی اے
ایہہ گل نیازی نئیں کیتی ایہہ گل قلندر کیتی اے
اوہدی عشق نماز ادا ہوئی جہنے یار نوں دیکھ کے نیتی اے
شاعر کا نام :- عبدالستار نیازی
کتاب کا نام :- کلیات نیازی