ذوقِ نظّارہ کو ہر وقت سفر میں رکھیے

ذوقِ نظّارہ کو ہر وقت سفر میں رکھیے

سبز گنبد کی فضا اپنی نظر میں رکھیے

---

عکس محبوبِؐ خدا قلب گُہر میں رکھیے

پھر گہر کو صدفِ دیدۂ تر میں رکھیے

---

تذکرہ آپؐ کے اوصاف کا ہے کارِ ثواب

شرط ہے اس کا تقاضا بھی نظر میں رکھیے

---

جس میں حضرتؐ پہ فدا ہونے کا جذبہ ہی نہ ہو

ایسے ایمان کو لے جائیے، گھر میں رکھیے

---

وہ بشر بھی ہیں، مگر صرف بشر ہی تو نہیں

یہ پرکھ مسئلۂ نور و بشر میں رکھیے

---

اُن کی اُلفت سے نہیں ہے کوئی شے بھی افضل

راہِ عقبیٰ کے اِسے زادِ سفر میں رکھیے

---

جن کا اُس نُورِ مجّسم سے نہ ہو ربطِ نیاز

ایسے مشکوک عناصر کو نظر میں رکھیے

---

عشقِ سرکارؐ کی دولت کو کریں عام نصیرؔ

گھر کی دولت ہے، مگر اِس کو نہ گھر میں رکھیے