قابلِ دید ہیں سب ماہ لقا لڑکے ہیں

قابلِ دید ہیں سب ماہ لقا لڑکے ہیں

نُور ہیں آپ نبیؐ ، نُور نُما لڑکے ہیں

---

مَہ وخورشید کی تابندہ فضا لڑکے ہیں

اپنے محبوبؐ کو خالق کی عطا ، لڑکے ہیں

---

طیّب اچھّے ہیں ، بَراہیم نہایت اچھّے

واقعی سارے زمانے سے جُدا لڑکے ہیں

---

رحمتیں خاص ہُوئیں قاسِم و عبداللہ پر

نُور ہی نُور سراپا بخدا لڑکے ہیں

---

صُورت اچھّی ہے تو فطرت میں پدر کا انداز

حاصلِ سلسلہ صدق و صفا لڑکے ہیں

---

اِن کے بے مثل روایات ہیں شاہد اِس پر

محرمِ شیوہ تسلیم و رِضا لڑکے ہیں

---

اِن کی توصیف، حقیقت میں سعادت ہے نصیؔر

نُورِ چشمانِ نبیؐ ، شانِ خدا لڑکے ہیں