فروغ مہر و مہ نُوں ویکھ آیاں
میں اپنے شہنشہ نُوں ویکھ آیاں
جھتے آرام یار غار کر دا
میں اُس آرام گہ نُوں ویکھ آیاں
مدینے چوں جو جاوے خُلد ولے
میں اُس پر کیف رہ نوں ویکھ آیاں
نبھاون ساتھ کیویں وچ مدینے
زر و جیب و گرہ نُوں ویکھ آیاں
کویں گنبد دے اُتے ٹھہر سکدی
تڑپ دی ہر نگہ نوں ویکھ آیاں
کویں ملدی مدینے چون ایں جنت
میں انداز ہبہ نُوں ویکھ آیاں
نبوت ختم جس تے ہوئی صائم
میں اُس طیبہ دے شہ نوں ویکھ آیاں
شاعر کا نام :- علامہ صائم چشتی
کتاب کا نام :- کلیات صائم چشتی