غم دیاں وا ورولیاں نے جند نمانی گھیر لئی
محبوباں دیا محبوبا آ جا تھوڑی دیر لئی
شام غماں دی مک دی ناہیں آس دا سورج نئیں چڑہدا
رو رو راتاں لنگدیاں نے خوشیاں بھری سویر لئی
عزت شہرت دولت راحت جنت وی رب بخش دتی
کنیاں کرم نوازیاں نے مٹی دے اس ڈھیر لئی
اوہدے گھر وچہ رحمت رب دی آن کے ڈیرا لالیندی
جس نے سوہنے دے ناں دی اک وی تسبیح پھیر لئی
کرم نوازیاں سوہنے نبی دیاں اپنیاں تک محدود نہیں
بن کے رحمت آیا اے سوہنا چار چوفیر لئی
قدماں دے وچہ سیس جھکایا گل نال لایا داتا نے
گنج کرم دے لے ٹریا خواجہ معین اجمیر لئی
جے چاہویں تے پل دے اندر بدل دیندا اے تقدیراں
لیکھ جگاؤنے مشکل نئیں سلطان ہجویر لئی
رات دنے منگاں میں دعاواں راضی رئے لج پال نبی
جیوندی جانیں مرجاساں جے سوہنے اکھ پھیر لئی
وگڑیاں بن جاون گیاں گلاں من لے گل نیازی دی
سوہنے نبی دی محفل وچہ بہہ جا تھوڑی دیر لئی
شاعر کا نام :- عبدالستار نیازی
کتاب کا نام :- کلیات نیازی