جتھے اللہ والے بہہ جاون اوتھوں پیار دی خوشبو آؤندی اے
جدوں گلاں کر دے آقا دی گفتار دی خوشبو آؤندی اے
اوتھے بھج بھج پھیرا پایا کر اوتھے شوق تھیں آیا جایا کر
جیٹری محفل وچوں پنج تنی گلزار دی خوشبو آؤندی اے
پھل مہکن آس امیداں دے ہر ویلے میریاں عیداں نیں
میں جس پاسے وی ٹر جاواں مینوں یار دی خوشبو آؤندی اے
ایہ گھڑیاں کیسیاں گھڑیاں نیں جہنوں دیکھو مستیاں چڑھیاں نیں
مینوں اس محفل چوں اج سوہنی سرکار دی خوشبو آؤندی اے
میں کہدی کہدی بات کراں میں کہدا کہدا نام لواں
تیرے سارے غلاماں چوں مینوں تیرے پیار دی خوشبو آؤندی اے
جان اوہو جان ہے جاناں چوں قربان ہووے جو جانی توں
دل اوہو دل اے جس دل چوں دلدار دی خوشبو آؤندی اے
مینوں اپنا آپ وی بھل جاندا در جنت والا کھل جاندا
جد مینوں اپنے مرشد دے دربار دی خوشبو آؤندی اے
طیبہ دیاں جنہاں گلیاں نیں سرکار دے جوڑے چمے نیں
اونہاں نوری گلیاں چوں اج وی سرکار دی خوشبو آؤندی اے
شاعر کا نام :- عبدالستار نیازی
کتاب کا نام :- کلیات نیازی