خردِ ارض و سما سیّد مکی مدنی ؐ
صاحبِ تاج ولوا سیّد مکی مدنی ؐ
ابنِ آذر کی دُعا سیّد مکی مدنیؐ
مظہرِ ذاتِ خدا سیّد مکی مدنی ؐ
مصدرِ صبر و رضا سیّد مکی مدنی ؐ
پیکرِ صدق و صفا سیّد مکی مدنیؐ
معدنِ حلم و حیا سیّد مکی مدنیؐ
مخزنِ جود و سخا سیّد مکی مدنیؐ
دافعِ رنج و بلا سیّد مکی مدنیؐ
شافعِ روزِ جزا سیّد مکی مدنیؐ
نورِ حق شمعِ ہدیٰ سیّد مکی مدنی ؐ
دیدہ و دل کی ضیاء سیّد مکی مدنیؐ
آپؐ کے فرق مبارک پہ ہی بس دیتا ہے زیب
تاجِ لولاک لما سیّد مکی مدنی ؐ
ہم غریبوں کیلئے ایک بڑی دولت ہے
آپ کا فقر و غنا سیّد مکی مدنیؐ
تاجِ فغفور کو خاطر میں کہاں لاتا ہے
آپ کے در کا گدا سیّد مکی مدنیؐ
میری دُنیا میں بھی خوش رنگ اجالے بھر دے
اے مرے ماہِ لقا سیّد مکّی مدنی ؐ
شاعر کا نام :- حفیظ تائب
کتاب کا نام :- کلیاتِ حفیظ تائب