خُوشا جھومتا جا رہا ہے سفینہ
پہنچ جائیں گے اِنْ شَآءَ اللہ مدینہ
اَب آیا کہ اَب آیا جَدّہ کا ساحِل
اَب آئے گا مکّہ چلیں گے مدینہ
میں مکّے میں جَاکر کروں گا طواف اور
نصیب آبِ زم زم مُجھے ہوگا پینا
خُدایا مدینہ نظر آئے جُوں ہی
تڑپ کر گِروں دے دے ایسا قرینہ
نہ کیوں میری قِسمت پہ رشک آئے مجھ کو
کہاں وُہ مَدینہ کہاں میں کمینہ
رہے وِردِ لَب کاش! ہر دم الٰہی
مدینہ، مدینہ، مدینہ، مدینہ
نظر نُور کی نُورِ ربُّ الْعُلیٰ ہو
مِرے دِل کا چمکا دو مَیلا نگینہ
کرم کیجے آقا دبائیں نہ مجھ کو
کبھی نفس و شیطاں اے شاہِ مدینہ
بچا لیجئے مُجھ کو فیشن سے آقا
عطا کیجئے سنّتوں کا خزینہ
پلا دو مُجھے سَاقِیا! جَام ایسا
رہوں مَست و بَیخود میں شاہِ مدینہ
تِرے عشق میں کاش!روتا رَہوں میں
رہے تیری اُلفت سے معمُور سینہ
تُو لِکھ دے الٰہی! مقدّر میں میرے
مدینے میں مرنا مدینے میں جینا
یہ تسلیم، عمدہ ہے خوشبوئے جنّت
مجھے کاش مل جائے اُن کا پسینہ
مریضِ مَحَبَّت کا دَم ہے لبوں پر
سِرہانے اب آجاؤ شاہِ مدینہ
بقیعِ مُبارَک میں دو گز زمیں دو
خُدارا کرم تاجدارِ مدینہ
نہیں روتے عُشاق دنیا کی خاطِر
رُلاتی ہے اُن کو تو یادِ مدینہ
نِگاہوں میں ہر دَم مدینہ بسا ہو
مجھے کاش مل جائے وہ چشمِ بِینا
تڑپتے ہیں روتے ہیں دیوانے تیرے
جہاں میں جَب آتا ہے حج کا مَہینا
ترستے ہیں جو دیدِ طیبہ کی خاطِر
دِکھا دیجئے نا انہیں بھی مدینہ
پِلا دو ہمیں جَامِ دیدار سَاقی!
کرم تِشنہ کاموں پہ شاہِ مدینہ
بِاذنِ الٰہی تِری سب خُدائی
ہے مَیخانہ تیرا تِرا جام و مِینا
تمہیں اے مُبلّغ! ہماری دُعا ہے
کئے جَاؤ طے تم ترقی کا زِینہ
تڑپ اُٹّھے آقا کے دیوانے عطارؔ
مدینے کی جانِب چلا جب سفینہ
شاعر کا نام :- الیاس عطار قادری
کتاب کا نام :- وسائلِ بخشش