کونین کے ہاتھوں میں مُحمّؐد کے عَلَم ہیں

کونین کے ہاتھوں میں مُحمّؐد کے عَلَم ہیں

پہنچے نہ جہاں ذہن وہاں اُن کے قدم ہیں

---

صدیاں ہی نہیں عہدِ رسالت کی کنیزیں

آفاق بھی سب حاشیہ بردارِ حرم ہیں

---

قرآن کا پڑھنا بھی زیارت ہے نبی کی

اوصاف ہیں تحریر خدوخال رقم ہیں

---

تاریکیِ پَیہم ہو تو وہ صُبح کا تارا

سُوکھا ہُوا موسم ہو تو وہ ابرِ کرم ہیں

---

مَیں اُن میں فنا ہو کے اُنھیں دیکھ رہا ہُوں

وہ زندہ سلامت پسِ دیوارِ عدم ہیں

---

اندر بھی مرے دفترِ سرکار کُھلا ہے

اس عرش کی تحویل میں بھی لوح و قلم ہیں

---

کِتنا ہی مَیں تقسیم ہُوں ‘ حاصل وہی میرا

کِتنی بھی خطائیں ہوں عنایات سے کم ہیں

---

آنکھیں بھی اُنھیں دیکھتی رہتی ہیں مظفّؔر

سانسیں بھی اُنہی قدموں کی آواز میں ضم ہیں