لوح بھی تو قلم بھی

لوح بھی تُو، قلم بھی تُو، تیرا وجود الکتاب

گُنبدِ آبگینہ رنگ تیرے محیط میں حباب

---

عالَمِ آب و خاک میں تیرے ظہور سے فروغ

ذرّۂ ریگ کو دیا تُو نے طلوعِ آفتاب

---

شوکتِ سنجر و سلیم تیرے جلال کی نمود

فقرِ جُنیدؒ و بایزیدؒ تیرا جمالِ بے نقاب

---

شوق ترا اگر نہ ہو میری نماز کا امام

میرا قیام بھی حجاب، میرا سجود بھی حجاب

---

تیری نگاہ ناز سے دونوں مراد پا گئے

عقل غیاب و جستجو، عشق حضور و اضطراب

---

تِیرہ و تار ہے جہاں گردشِ آفتاب سے

طبعِ زمانہ تازہ کر جلوۂ بے حجاب سے