زہد و تقویٰ پہ نہ تکمیلِ عبادت پہ ہے ناز

زہد و تقویٰ پہ نہ تکمیلِ عبادت پہ ہے ناز

ہم غلاموں کو غلامیِ رسالت پہ ہے ناز

---

جلوہ گر رحمتِ عالم تری آغوش میں ہے

اے حلیمہ ہے بجا جو تجھے قسمت پہ ہے ناز

---

کتنے بدبخت ہیں وہ ہوگئے دل ان کے سیاہ

برملا جو کہیں تضحیکِ رسالت پہ ہے ناز

---

کام آئے گی یہی حُبِ نبیؐ محشر میں

اس لیے ہم کو فقط حُبِ نبوت پہ ہے ناز

---

امتی آپ کا ہونے کی تمنا لے کر

انبیا تک کو بھی سرکار کی امت پہ ہے ناز

---

فخر تقویٰ پہ بھلے ہی کریں شب زندہ دار

ہم کو بس شافعِ محشر کی شفاعت پہ ہے ناز

---

جس سے دو نیم ہوئی پل میں زمینِ مہتاب

ہم کو اس جنبشِ انگشتِ رسالت پہ ہے ناز

---

سرنگوں کر دیا جس نے سرِ باطل کا غرور

بدر کے تین سو تیرہ کی شجاعت پہ ہے ناز

---

یوں تو اصنافِ سخن اور بھی احسؔن ہیں مگر

مجھ کو بس سرورِ کونین کی مدحت پہ ہے ناز