ظلم و استبداد کا ظالم کے لشکر کا محاذ
آمدِ سرور ہوئی ٹوٹا ستم گر کا محاذ
کیوں نہ ملتا خاک میں باطل خداؤں کا غرور
دہر میں قائم ہوا اللہ اکبر کا محاذ
فوجِ باطل پر پڑی جب ضرب الا اللہ کی
ریزہ ریزہ ہوگیا باطل کے ہر شر کا محاذ
انقلابِ مصطفیٰؐ نے دہر میں قائم کیا
صاحبانِ آشتی و امن پیکر کا محاذ
دہر میں دین خلیلی کا ہوا رائج نظام
ہوگیا نابود ہر اصنامِ آزر کا محاذ
ظلم کے مدِ مقابل شہ نے یکجا کر دیا
تھا جو بکھرا بے کس و مظلوم و بے در کا محاذ
دشمنوں کے بیچ سے نکلے شبِ ہجرت حضور
رہ گیا سارا دھرا بو جہل کے شر کا محاذ
دی شکستِ فاش پھر بھی لشکرِ اشرار کو
مختصر تھا کربلا میں ابنِ حیدر کا محاذ
یادِ طیبہ آتے ہی احسؔن بنا دے چشمِ غم
اشک ہائے ہجر سے با دیدۂ تر کا محاذ
شاعر کا نام :- احسن اعظمی
کتاب کا نام :- بہارِ عقیدت