تھا مِہر صِفَت قافلہ سالار کا چہرہ

تھا مِہر صِفَت قافلہ سالار کا چہرہ

نیزے پہ دمکتا رہا ، سردار کا چہرہ

---

وہ آئنہ تھا چہرہء شبیر کہ جس میں

آتا تھا نظر ، حیدرِ کرّار کا چہرہ

---

صد حیف وہ خود یُوں بھرے بازار سے گُزرے

جس گھر نے نہ دیکھا کبھی، بازار کا چہرہ

---

ہے پیاس کی شدّت ، وہ سکینہ کے لبوں پر

مثلِ عَلَم اُترا ہے، علمدار کا چہرہ

---

آثار کچھ ایسے تھے زینب کی نظر سے

دیکھا نہ گیا ، عابدِ بیمار کا چہرہ

---

اشکوں کی طرح تھے جو ستارے شبِ عاشُور

تھا چاند بھی اک اُں کے عزادار کا چہرہ

---

وہ خُطبہء زینب کہ علی بول رہے تھے

ہر لفظ پہ فق تھا ، بھرے دربار کا چہرہ

---

دیکھو گے خورشیدِ قیامت کے مقابل

لَو دے گا نصیؔر اُن کے پرستار کا چہرہ