!اب تنگیِ داماں پہ نہ جا اور بھی کچھ مانگ

اب تنگیِ داماں پہ نہ جا اور بھی کچھ مانگ!

!ہیں آج وہ مائل بہ عطا اور بھی کچھ مانگ

---

ہیں وہ مُتوجہِّ، تو دُعا اور بھی کچھ مانگ

!جو کچھ تجھے مِلنا تھا مِلا، اور بھی کچھ مانگ

---

ہر چندِ کہ مولاؐ نے بھَرا ہے تِرا کشکول

!کم ظرف نہ بن ہاتھ بڑھا، اور بھی کچھ مانگ

---

چھُو کر ابھی آئی ہے سرِ زلفِ محمدؐ

!کیا چاہیے اے بادِ صبا اور بھی کچھ مانگ

---

یا سرورِؐ دیں، شاہِؐ عرب، رحمتِؐ عالم

!دے کر تہِ دل سے یہ صدا اور بھی کچھ مانگ

---

سرکارؐکا دَر ہے درِ شاہاں تو نہیں ہے

!جو مانگ لیا، مانگ لیا، اور بھی کچھ مانگ

---

جن لوگوں کو یہ شک ہے کرم اُن کا ہے محدود

!اُن لوگوں کی باتوں پہ نہ جا اور بھی کچھ مانگ

---

اُس دَر پہ یہ انجام ہُوا حُسنِ طلب کا

!جھولی مِری بھَر بھَر کے کہا اور بھی کچھ مانگ

---

سُلطانِؐ مدینہ کی زیارت کی دُعا کر

!جنّت کی طلب چیز ہے کیا اور بھی کچھ مانگ

---

دے سکتے ہیں کیا کچھ کہ وہ کچھ دے نہیں سکتے

!یہ بحث نہ کر، ہوش میں آ اور بھی کچھ مانگ

---

مانا کہ اِسی دَر سے غنی ہوکے اُٹھا ہے

!پھر بھی در سرکارؐ پہ جا اور بھی کچھ مانگ

---

پہنچا ہے جو اُس دَر پہ تو رہ رہ کے نصیرؔ آج

!آواز پہ آواز لگا! اور بھی کچھ مانگ