جدوں بھانبڑ جُدائیاں دے میرے دل وچہ بلے رہندے
زمانے بھر دے غم سارے میرے سر توں ٹلے رہندے
جہناں نوں تاہنگ لگ جاندی اے محبوباں دے ملنے دی
قیاماں تے سلاماں دے بہانے اور کھلے رہندے
سدا سرکار دی سچی حضوری وچہ اوہ رہندے نے
جہناں دے پلک دی ہر نوک توں اتھرو ڈھلے رہندے
جو نقش پا میرے محبوب دا اک وار تک لیندے
اوہ پیراں وِچ رُلے رہندے اوہ گھٹے وچ رلے رہندے
جہناں نوں خون دل دا، پانی ہنجواں دا سدا مل دا
خزاں وچہ وی اوہ بُوٹے آس دے پُھلے پھلے رہندے
غنیمت نے اوہ سبھے بستیاں دنیا دے تختے تے
جلا کے گھر جہناں وچہ ہین اک دو دل جلے رہندے
خُدا جانے سکھاندا مچھی نوں پانی کیویں صائم
ندی ہنجواں دی بن کے وی میرے دیدے تلے رہندے
شاعر کا نام :- علامہ صائم چشتی
کتاب کا نام :- کلیات صائم چشتی