مینوں بخشیاں عزتاں مصطفیٰ نے
مینوں کون جانے جے سوہنا نہ جانے
اوہدے در دے کہندے گئے نیں سوالی
نہ جد تیک چاہوے مدینے دا والی
اودوں تیک اوندے نئیں ویلے سہانے
مینوں بخشیاں عزتاں مصطفیٰ نے
اوہدے نام دی لوک جپدے نے مالا
اوہدی وچ قبر دے اجالا اجالا
جیہڑا اپنے آقا نوں جانے پچھانے
مینوں بخشیاں عزتاں مصطفی نے
اوہ ہے ساریاں سوہنیاں نالوں سوہناں
اوہدے جیڈ کوئی وی ہو یا نہ ہوناں
اوہدے مرتبے اوہدا الله ای جانے
مینوں بخشیاں عزتاں مصطفیٰ نے
کہدے در تے جا کے میں دیواں دھائیاں
تینوں جان داتا تیرے کول آئیاں
میری جھولی پا دے کرم دے خزانے
مینوں بخشیاں عزتاں مصطفیٰ نے
دروداں سلاماں دی محفل سجائیے
کسے دکھاں مارے دی سکھ جھولی پائیے
خدا بهال دا بخششاں دے بہانے
مینوں بخشیاں عزتاں مصطفیٰ نے
نبی دا اے صدقہ ملی مینوں عزت
اوہدے نام نے مینوں بخشی اے شہرت
میں گاواں گا ہر دم نبی دے ترانے
مینوں بخشیاں عزتاں مصطفیٰ نے
رہویں سوہنیاں اپنے منگتے تے راضی
ہو وے لہندے چڑھدے نیازی نیازی
تیرا نام لے کے سدا موجوں مانے
مینوں بخشیاں عزتاں مصطفیٰ نے
شاعر کا نام :- عبدالستار نیازی
کتاب کا نام :- کلیات نیازی