میرے افکار ہیں پروردۂ دربارِ رسول

میرے افکار ہیں پروردۂ دربارِ رسول

میں کسی اور تجسّس میں رہوں نا ممکن

---

جالیاں روضہء اقدس کی یہ دیکھ آیا ہے

اور لے جائے کہیں میرا جنوں نا ممکن

---

بخش دیتا نہیں جب تک مری اُمت کو خدا

بولے سرکار کہ اس دل کو سکوں نا ممکن

---

سر کے بل چل کے بھی تھکتا نہیں مدحت میں قلم

میں اُٹھاؤں تو یہ کہتا ہے اُٹھوں نا ممکن

---

ان کی سیرت سے بیگانگی ورنہ لوگو !

اُن کی اُمت کا ہو یہ حالِ زبوں نا ممکن

---

ایک شب آپ نے بخشا مجھے اپنا دیدار

ماسوا اس کے تمنّا میں کروں نا ممکن

---

اُن کی زُلفوں کی ہوا کھائی تو بولی یہ صبا

اب کسی گُل میں گزارا میں کروں نا ممکن

---

جو محمد کا ہے دیوانہ وہ د ل ہے آزاد

کوئی چاہے اسے قابو میں کروں نا ممکن

---

وہ جسے چاہیں ادیبؔ اس کو عطا کرتے ہیں

ہر کسی کو ملے یہ سوزِ دروں نا ممکن