ہیں اہل محبت نغمہ سرا سبحان اللہ سبحان اللہ
ہر سمت ہے شورِ صل علیٰ سبحان اللہ سبحان اللہ
ضَو بار ہوئے محبوب خدا سبحان اللہ سبحان اللہ
ہیں نور سے جگمگ ارض و سما سبحان اللہ سبحان اللہ
یکتائے جہاں ہیں جو بخدا ثانی ہی نہیں کوئی جن کا
وہ آج ہوئے عالم آرا سبحان اللہ سبحان اللہ
اے ختمِ رسل اے سرورِ کل اے غایتِ کل ہادئ سُبل
ہے کعبہ جاں دربار تِرا سبحان اللہ سبحان اللہ
جو رحمت ہے سر تا بقدم ہیں جس کے سب ممنونِ کرم
وہ ابرِ کرم ہر سو بر سا سبحان اللہ سبحان اللہ
اے نازشِ آدم جانِ کر اے مظہر ِ حق سے نورِ اتم
ہے دید تِری دیدارِ خدا سبحان اللہ سبحان اللہ
ہر مشکل میں کام آتے ہیں ہر بگڑی بات بناتے ہیں
کونین کے ہیں وہ عقدہ کشا سبحان اللہ سبحان اللہ
خالِدؔ یہ وظیفہ ہے میرا ضائع تو نہیں کوئی لمحہ
یا سیّد نا یا ملجَا نا سبحان اللہ سبحان اللہ
شاعر کا نام :- خالد محمود خالد
کتاب کا نام :- قدم قدم سجدے