ہُوا نہ ہو گا جہان بھر میں ، کوئی رسالت مآب جیسا

ہُوا نہ ہو گا جہان بھر میں ، کوئی رسالت مآب جیسا

بجز نبی کے کسے ملا ہے صحیفہ اُم الکتاب جیسا

---

وہ ایسے اخلاق کے ہیں پیکر، عدو بھی ان کو پکارے صادق

کوئی نہ لایا نہ لا سکے گا، وہ لائے ہیں انقلاب جیسا

---

اُنہیں کو رحمت بنا کے بھیجا ، ہے عا لمیں کے لئے خدا نے

ملے گا نَے مل سکا کسی کو ، ملا ہے اُن کو خطاب جیسا

---

وہ لائے تشریف جب جہاں میں ، مٹا اندھیرا ہُوا سویرا

ازل کی تاریکیوں میں بھیجا ، خدا نے وہ آفتاب جیسا

---

جو اُن کے دربار کے ہیں زائر، وہ کہہ رہے تھے یہ مجھ سے آصف

مدینے جانا پلٹ بھی آنا، ہمیں یہ لگتا ہے خواب جیسا