سنی آہٹ تری دیکھا حرم ہے

سنی آہٹ تری دیکھا حرم ہے

ترا نقشِ قدم میرا حرم ہے

---

مرے سجدوں کی ہو کیونکر رسائی

مرے سر سے بہت اونچا حرم ہے

---

ابھی تک ہے ترے اشکوں کی خوشبو

حرا تیری جوانی کا حرم ہے

---

چھپا رکھّا ہے سینے میں نبیؐ کو

زمیں کا سارا سرمایا حرم ہے

---

عمل کی جیب میں سکے ہیں کتنے

خریدارو بہت مہنگا حرم ہے

---

خدا بھی میرے اندر مصطفےٰؐ بھی

حرم کے سامنے گویا حرم ہے

---

ہوائیں ہاتھ ہیں آنکھیں اجالا

بدن ہے زندگی چہرہ حرم ہے

---

خدا کا نور ہے جسمِ محمدؐ

خدا کے عرش کا سایا حرم ہے

---

وہ کوئے وقت کا پہلا مسافر

اسی کا مستقل حجرہ حرم ہے

---

ضروری ہے طواف اس کا ضروری

حرم ہے مرکزِ دنیا حرم ہے

---

محمدؐ آ رہے ہیں جا رہے ہیں

مرا دل ہے مظفر یا حرم ہے