وہ نام آئے زبان و لب پر تو دل میں تازہ گلاب اُتریں

وہ نام آئے زبان و لب پر تو دل میں تازہ گلاب اُتریں

نظر کی غارِ حرا میں کتنے ہی لفظ بن کر کتاب اُتریں

---

اُسی کے حُسنِ عطا کے باعث ہو رحمتوں کا نزول مجھ پر

اُسی کے دامن کو چھُو کے دونوں جہاں کے مجھ پر ثواب اُتریں

---

میں شام ہوتے ہی ڈوب جاؤں لطیف سوچوں کی نکہتوں میں

اُداس بوجھل ، دراز پلکوں پہ خوبصورت سے خواب اُتریں

---

مرے شکستہ بَدن پہ اُس کا ہزار سمتوں سے نُور برسے

مری دُعاؤں کی سرزمیں پر محبتوں کے سحاب اُتریں

---

عجیب اُس کی بصیرتیں ہیں کہ جن کے آگے زمانے بھر کے

بکھر بکھر کر سوال ابھریں نکھر نکھر کر جواب اُتریں

---

لہو میں کرلوں میں جذب انجؔم جمیل سوچیں تمام اُس کی

یہ عین ممکن ہے اس طرح کچھ حقیقتوں کے نقاب اُتریں