زمیں سے گزرتی ہوئی آسماں تک
تری بات پہنچی کہاں سے کہاں تک
عقیدت کے آتے ہیں لاکھوں پڑاؤ
مری داستاں سے تری داستاں تک
ہر اِک شے کے دامن کو مہکا گئی ہے
تری باس پہنچی جہاں سے جہاں تک
ترا نام ہونٹوں پہ لانے سے پہلے
کئی پھول مہکے ہیں دِل سے زباں تک
درُودوں کی بارش برستی رہے گی
تری ذات پر کہکشاں کہکشاں تک
ترے نام کی گونج دونوں جہاں میں
تری بات پھیلی ہے کون و مکاں تک
شاعر کا نام :- انجم نیازی
کتاب کا نام :- حرا کی خوشبُو