محمد پیاریا سرور حبیبا
جگاؤنا اے کدوں میرا نصیبا
لباں تے جان ہے صائم دی آئی
خدا دے واسطے آجا طبیبا
غماں نے جان ہے میری جلائی
تُساندی دید ہے میری دوائی
ہے دیوانہ تیرا ناچیز صائم
زمانہ آکھدا مینوں سودائی
محمد مصطفے شاہ زمانہ
ہے منبع فیض دا تیرا گھرانہ
جے مل جاوے گدائی تیرے گھر دی
ملے صائم نوں رحمت دا خزانہ
صبا جاویں تے آکھیں مُصطفیٰ نوں
خدا دے لاڈلے نور الہدی نوں
ترا صائم تڑپدا دور تیتھوں
بلا شاہا کدی در تے گدا نوں
میں روواں رات دن ہجراں ستایا
غماں دی آگ نے مینوں جلایا
ہے تیری یاد دا صائم نے دیوا
مقدر دے ہنیرے وچ جگایا
ہجر وچ یا نبی ہنجو بہاواں
کُھلاواں پوتھیاں قسمت وکھاواں
مقدر ویکھ کے چپ ہون پاندھے
تے صائم میرے لب تے اون ہاواں
زمانے نوں تُساں در تے بُلایا
گیا خالی جو جھولی بھر کے آیا
پتہ نہیں کیوں اے صائم دے طبیبا
مريض عشق دا چیتا بھلایا
غم ہجراں نے میری جان بالی
مدینے سد لوؤ دُکھیاں دے والی
خیالاں وچ رہوے ہر وقت صائم
ہرے گنبد دی نُوری پاک جالی
نہ طالب تاج تختاں دا نہ زر دا
کمینہ سگ ہاں میں اس پاک در دا
جتے عرشاں اُتوں ہر وقت صائم
رہوں چھم چھم خدا دا نور ورھدا
میرے دکھاں دا دارو دید تیری
تیرا دیدار ہے بس عید میری
کھڑا دے آن کے آساں دے غُنچے
تے پوری کر دیو امید میری
ذرا رک جا سنبھل جا اے خیالا
ہنیرا مٹ گیا ہویا اُجالا
نی اکھیو چم لوو ایہ سبز گنبد
اہدے اندر ہے صائم کملی والا
شاعر کا نام :- علامہ صائم چشتی
کتاب کا نام :- کلیات صائم چشتی