نور یٰسین ہے طٰہٰ ہے نبی کی مدحت

نور یٰسین ہے طٰہٰ ہے نبی کی مدحت

سارا قرآن خدا کا ہے نبی کی مدحت

---

عظمتِ مدحتِ سرکار ہے ظاہر اس سے

بر سرِ عرشِ معلیٰ ہے نبی کی مدحت

---

شادمانی کا سماں ہو کہ غموں کا موسم

دل تو ہر حال میں کرتا ہے نبی کی مدحت

---

اور کچھ حسنِ عمل پاس نہیں ہے میرے

آخرت کا یہی توشہ ہے نبی کی مدحت

---

سارے اصنافِ سخن کرتے ہیں اس فن کا طواف

یعنی ہر علم کا قبلہ ہے نبی کی مدحت

---

ذہن و دل سن کے منور ہیں معطر بھی ہیں

نور و نکہت کا ذخیرہ ہے نبی کی مدحت

---

احتیاط اس میں ضروری ہے شفیقِؔ عاصی

سرِ شمشیر پہ چلنا ہے نبی کی مدحت